Verset du mois d'avril 2011

« Dès le matin, répands ta semence et, jusqu’au soir, n’accorde pas de repos à ta main, car tu ne sais pas qui va réussir, si une chose ou une autre, ou bien les deux, seront un succès. »  ( Ecclésiaste 11:6) Bible du Semeur

 .....................................................................................................................................

« Nan maten, plante jaden ou. Aswè rive, plante jaden ou ankò. Ou pa janm konnen kilès nan de yo ap bay plis rannman. Ou pa janm konnen si tou de p’ap pran, si tou de p’ap bay menm rannman. »     (Eklezyas 11:6) Bible Société Biblique Haïtienne

......................................................................................................................................

Nan vèsè mwa mas la (Jenèz 8:32), nou te pale sou Lwa Semans-Rekòt la ki di: TOU SA W PLANTE AP BAY YON REKÒT. Men, pou toujou gen rekòt, kisa nou dwe fè? Pou toujou gen rekòt, nou dwe KONTINYE  PLANTE. “Kontinye simen semans ou an, paske ou pa janm konnen kilès ladan yo k’ap grandi – pètèt yo tout ap grandi.” (Eklezyas 11:6, The Living Bible).

          Kilè nou dwe plante ? Nou dwe plante toutan : nan bon tan, nan move tan. Poukisa ? Paske  wòl pa nou se plante epi awoze. Moun ki ap fè semans lan leve, grandi epi pote fwi, se BONDYE (1 Korentyen 3:6-7).

          Se poutèt sa, nou bezwen disipline tèt nou pou nou kontinye plante regilyèman (Lwa Konsistans) epi pran swen  jaden  an si nou vle travay n’ap fè a pote tout fwi li kapab pote. Si se pa sa, raje ap toufe plant yo. (2 Korentyen 9:6 ; Pwovèb 18:9 ; Matye 24:45-46) 

 

Chant du mois: # 226 français CE (Semons dès l'aurore)

2011: Ane Pou Nou Disipline Tèt Nou.

J. Jonas LOUISAIRE

Si vèsè sa a te yon benediksyon pou ou, pataje temwayaj la

Voye yon SMS Tel. : 5093-8159746

Boîte Postale 11060, Carrefour, Haïti (W.I.)

www.motivationbiblique.blogspot.com

Verset du mois de mars 2011

« Tant que la terre subsistera, les semailles et la moisson, le froid et la chaleur, l’été et l’hiver, le jour et la nuit ne cesseront point.                   

(Genèse 8:22) Bible Louis Segond

 .........................................................................................................................................

« Toutotan latè a la, va gen yon lè pou plante, yon lè pou rekòlte, va gen sezon fredi ak sezon chalè, va gen sezon sèk ak sezon lapli, va gen lajounen, va gen lannwit. Wi, toutotan latè a la, bagay sa yo p’ap janm sispann. »  

 (Jenèz 8:22) Bible SBH

.........................................................................................................................................

             Kisa ki ba yon kiltivatè fòs  ak  kouray pou li prepare chan an (moso tè a), simen yon semans oswa plante yon pye-bwa ? Kisa ki fè li aksepte travay menm anba chalè oswa fredi ? Kisa ki  fè li pa bay vag menm lè foumi  oswa kèk  lòt ensèk ta mòde l’?

            Li fè tout sa paske li gen espwa ap gen yon rekòt. Li senpleman respekte epi aplike yon prensip, yon lwa. Lwa sa a se Lwa Semans – Rekòt (Jenèz 8:22; Eklezyas 3:2). Kisa lwa natirèl sa a (se yon lwa espirityèl li ye tou) di?

            Lwa SEMANS-REKÒT la di: TOU  Sa  W  PLANTE  AP  BAY  YON REKÒT – byen oswa mal. (Jak  2:23; Job 4:8 ; 2 Korentyen 9:6 ; Galat 6:8; Matye 26:52; Matye 6:14 ; Oze 8:7; Pwovèb 15:1).

            Nou dwe deside ki rekòt nou vle rekòlte, ki fwi nou vle pwodui. Apre sa, nou dwe disipline tèt nou pou nou simen sèlman semans ki ka bay fwi  nou ap tann nan. Ki semans w ap plante nan lespri w ? ( Pwovèb 4: 23 ; Matye 12:34 ; Women 10:17; Filipyen 4:8 ; Jenèz 4:7). Ki  semans w ap simen pou 10 pwochen  lane nan lavi w ?

Chant du mois: # 242 français CE (Le temps est court pour accomplir la tâche)

2011: Ane Pou Nou Disipline Tèt Nou.

J. Jonas LOUISAIRE

Si vèsè sa a te yon benediksyon pou ou, pataje temwayaj la

Voye yon SMS Tel. : 5093-8159746

Boîte Postale 11060, Carrefour, Haïti (W.I.)

www.motivationbiblique.blogspot.com

Verset du mois de février 2011

« Celui qui se relâche dans son travail est frère de celui qui détruit.»  

                          (Proverbes 18:9) Bible Louis Segond

        ........................................................................................................

« Moun ki parese nan travay li se menmman parèyman ak  moun k’ap defèt sa k’ap fèt.»  

                     (Pwovèb 18:9) Bible Société Biblique Haïtienne

        ........................................................................................................

          Èske w te fè yon bilan sou lavi w [an jeneral ] e sitou sou lavi ak BONDYE (jan  nou te konseye  w fè sa nan vèsè mwa  janvye 2011 la) ? (Li 2 Korentyen 13:5).

          Yon bilan ap ede w :1) wè ki kote w te ye ; 2) wè ki kote w ye ; 3) mezire pwogrè w fè ; 4) wè pwogrè w te ka fè epi sonje w ka avanse toujou ; 5) wè si w sou wout  ki mennen kote  w vle rive a. Si w pa sou wout sa a, kisa w bezwen fè ? Ou bezwen DESIDE pran yon lòt wout , wout  k’ap ede rive a, epi fè sa vit. (Sòm 139:24 ; Pwovèb 22:3; Filipyen 3:13-14).

          Pa bliye, premye  travay  BONDYE  bay fè se byen jere pwòp tèt pa w. (Women 14:12; Galat 6:4). Pou w pa detwi  pwòp  tèt pa w, pou w pa sèvi obstak pou pwogrè pwòp tèt ou (nan nenpòt domèn: espirityèl, entèlektyèl, finans (lajan), familyal, pwofesyonèl, etc.), ou dwe kontinye travay regilyèman. Se poutèt sa, ou dwe disipline tèt ou.

          Èske w ap kite parès, endisiplin, dekourajman ak  distraksyon, bloke w pou w pa pwogrese? (Pwov. 18:9; Ebre 10:35-39)  Kenbe fèm. Kontinye avanse. 

Chant du mois: # 194 français Chants d’Espérance (Jésus te confie / Une œuvre d’amour)

2011: Ane Pou Nou Disipline Tèt Nou.

J. Jonas LOUISAIRE

Boîte Postale 11060, Carrefour, Haïti (W.I.)

Verset du mois de janvier 2011

« Prenez garde à vous-mêmes, afin que vous ne perdiez pas le fruit  de votre travail, mais que vous receviez une pleine récompense. » 

                              (2 Jean v 8) Bible Louis Segond

         ....…………………………………………………………

« Veye kò nou byen pou nou pa pèdi benefis travay nou an, pou nou ka resevwa tout rekonpans nou. »

                    (2 Jan v 8) Bible Société Biblique Haïtienne

         ……………………………………………………………

          Kilè w ap fè yon bilan sou lavi w [an jeneral ], e sitou lavi w ak BONDYE ? (2 Korentyen 13:5) Kòman lavi w ye? Pa bliye BONDYE ba w responsablite pou w jere lavi w (Matye 12:36; Women 14:12; Gal 6:4-5; 1 Korentyen 3:16-18; Ebre 9:27). Kòman travay BONDYE  ba w fè a ye? (Kolosyen 4:17; 2 Tim 4:5)

          BONDYE ban nou responsablite pou nou veye sou pwòp tèt nou (2 Jan v 8). Poukisa ? 1) Pou nou sèten nou rete nan doktrin (prensip, wout) KRIS te kite pou nou ka jwenn  epi  rete  ak PAPA  a ; 2) Pou nou pa pèdi benefis (fwi, rekonpans) travay nou an.

          Si se pa sa, nou ka : a) fè kòve ; b) dekouraje, sispann travay, pèdi lafwa epi abandone kous la.

          Se poutèt sa, ann disipline tèt nou  pou nou kontinye viv jan BONDYE vle a epi  fè travay nou gen pou nou fè (Pov.18:9; Eklezyas 9:10; 2 Jan v 8). Kenbe fèm. Kontinye avanse.

Chant du mois: # 38 français Echos des Elus (Je vous envoie travailler sans relâche)

Tèm ane 2011 la: Ane Pou w Disipline Tèt Ou.

J. Jonas LOUISAIRE

Boîte Postale 11060, Port-au-Prince, Haïti

Verset du mois d'octobre 2010

« Je t’avais plantée comme une vigne excellente Et du meilleur plant;  Comment as-tu changé, Dégénéré en une vigne étrangère ? »  

                      (Jérémie 2:21) Bible Louis Segond

 .......................................................................................................

« Mwen te plante ou tankou yon pye rezen kalite, ki sòti nan bon semans. Men kounyeya, gade jan ou chanje: Ou tounen yon vye pye rezen mawon. M pa konnen kote ou sòti. »

              (Jeremi 2:21) Bible Société Biblique Haïtienne

 ........................................................................................................

Kote premye lanmou w te gen pou BONDYE a ? Kote zèl ak devouman w te gen pou travay BONDYE a pase ? Kote kontra w te gen ak BONDYE  a ? Ou kwè se ou ki te di ou dakò. Ou bliye ?

            Kilès ou panse ki te plante premye lanmou sa a nan kè w ? (Li Filipyen 2:13 ; Revelasyon 2:4-5)  Se BONDYE ki te plante l. E ou menm, ki travay pa w ?

Travay pa w se :

1)  Pa vire do bay BONDYE. Sa vle di: pa neglije pawòl BONDYE epi fè tout sa BONDYE di w fè. Se BONDYE ki sous la; se li ki pou nouri w. 2) Pa manje manje bliye. Ou pa dwe gen memwa kout. Ou pa dwe retounen an Ejip ki se senbòl : zidòl, konvwatiz, plezi nan move kondisyon, enfidelite, peche, malpwòpte, pwostitisyon, etc. 3) Rekonèt BONDYE kòm sèl MÈT ou. Lè w obeyi BONDYE ak pawòl li, ou dakò BONDYE  gen otorite sou lavi w. E lè w pa obeyi BONDYE, kisa w vle di?

            Kilès ki Mèt ou ? (Li Ezayi 1:3) Kilès ou obeyi ? Kisa ou fè ak gras BONDYE a ? Ki fwi w bay kòm “pye rezen” ?

P.S. Pou pi byen konprann, m ankouraje nou li tout chapit 2 a (Jeremi)

Chant du mois: # 118 créole CE (Mwen te chwazi nèt pou toujou)

JonasLOUISAIRE

Motivateur

Verset du mois de juillet 2010

« Eh quoi ! Si quelques-uns n’ont pas cru, leur incrédulité anéantira-t-elle la fidélité de Dieu ? Loin de là ! Que Dieu, au contraire, soit reconnu pour vrai, et tout homme pour menteur... »

                        (Romains 3:3-4) Bible Louis Segond

..............................................................................................................

«Bon, tande non.Si gen ladan yo ki pa  kenbe pawòl yo, èske poutèt sa Bondye  p’ap kenbe pawòl li tou ?  O, non, se lekontrè. Menm si tout moun ap bay manti, Bondye gen pou fè sa ki pou fèt la rive vre... »

                (Women 3:3-4) Bible Société Biblique Haïtienne

  Kisa BONDYE te di ? Kote tè pwomès pa w la ? Ki moun ki te fè w pwomès  la ? Èske w vle bay vag tout bon vre ? Chak pwomès BONDYE antre nan plan  BONDYE pou glwa BONDYE.

      Pafwa nou mezire BONDYE ak mezi nou mezire tèt nou. Paske nou gen limit nou panse BONDYE gen limit [nan kapasite li] tou. BONDYE pa menm jan ak moun. Menm jan syèl  la byen lwen anwo latè, se konsa kapasite BONDYE byen lwen anwo kapasite nou (Li Ezayi 55:8-11). Se poutèt sa, lè yon bagay enposib pou

moun fè, BONDYE kapab fè li (Matye 19:26).

      Menm si nou pa vle kwè BONDYE kapab fè sa li pwomèt l’ap fè a, sa p’ap chanje anyen nan fidelite BONDYE. Plan BONDYE ap reyalize kanmenm, avè w oubyen san ou-menm. Men, si w pa vle kwè: 1o) ou kapab rekòlte fwi enkredilite w epi peri nan dezè a (Nonb 14:11, 27-28, 34); 2o) ou kapab retade pwosesis la; ou ka oblije tann yon lòt sezon; 3o) ou kapab wè l ak  je w epi w pa ka manje ladan l (2 Wa 7:2).  

      Seyè, se pou volonte w fèt!

Chant du mois : # 13 Chan d'Esperans

(Lè n'ap mache ak Dye/Obeyi kwè/Se tou sa pou nou fè)

JonasLOUISAIRE

Motivateur

Verset du mois de juin 2010

« Dieu n’est pas un homme pour mentir, Ni fils d’un homme pour se repentir. Ce qu’il a dit, ne le fera-t-il pas? Ce qu’il a déclaré, ne l’exécutera-t-il pas. »

  (Nombres 23:19) Bible Louis Segond  

 ......................................................................................................

« Bondye pa tankou moun k’ap bay manti. Non! Li pa tankou moun k’ap chanje lide yo pou ti krik ti krak. Depi li pwomèt yon bagay, l’ap fè l. Depi li pale, fòk sa li di a rive! »

                  (Nonb 23:19) Bible Société Biblique Haïtienne

   

Lè BONDYE  fè  w  yon pwomès, èske  w kwè  epi sezi pwomès sa a pa mwayen lafwa ? Si w pa kwè sa BONDYE di, kilès ou kwè? Ou kwè w ta bliye verite sa a: “Pawòl  BONDYE  a  aji (efikas, fè mirak ) pou moun ki kwè (1 Tesalonisyen 2:13)”?

        Pawòl BONDYE se verite.(2 Samyèl 22:31; Jan 17:17). Sa w dwe fè, se aksepte nenpòt sa BONDYE  di (nan pawòl li). BONDYE di li pa konn bay manti; li toujou kenbe pwomès li. Poukisa w kontinye ap mande si se vre? Poukisa w ap doute? Paske sitiyasyon pa w la difisil ? Pa gen anyen ki enposib pou BONDYE (Matye19:26 ; Mak  10:27).

        Pa bliye li vèsè sa yo: Jeremi 1:12; Women 4:21; Travay[Actes] 27:25; Ezayi 59:1-21; 2 Timote 2:13; Jan 11:40.       

Chant du mois : # 10 Haïti Chante avec Radio Lumière (Mouin p’ap kite ou ni bliye ou)

JonasLOUISAIRE

Motivateur